24.04.2026
1990 сыллар саҕаттан үтүө үгэскэ кубулуйан ыытыллар сахалыы устар ууну сомоҕолуур хомоҕой тыллаахтар «Аман өс» өрөспүүбүлүкэтээҕи араатардар күрэхтэрэ быйыл кэтэхтэн ыытылынна. Уус-уран тыл сүөгэйин-сүмэтин илдьэ сылдьар, санаатын сайа этэр кыахтаах дьон күрэстэрин сүрүн тэрийээччитинэн СӨ Национальнай бибилэтиэкэтин Төрүт олохтоох норуоттарын киинин кыраайы үөрэтэр национальнай пуондата буолар.
Күрэх сүрүн сыала-соруга — сахалыы тыл-өс олох бары эйгэтигэр туттуллар кыаҕын көрдөрүү, Арассыыйа норуоттарын ытык өйдөбүллэрин тула кэпсэтэр, санаа атастаһар усулуобуйаны тэрийии, тыл этии үөрэҕэр тирэҕирэн, дьону-сэргэни итэҕэтэн, бэйэ санаатын сахалыы сайа этэри көҕүлээһин.
Дьүүллүүр сүбэ бэрэссэдээтэлинэн үлэлээтэ педагогика билимин хандьыдаата, СӨ үөрэҕириитин үтүөлээх үлэһитэ, Төрөөбүт тылы чинчийэр, харыстыыр уонна сайыннарар киин үлэһитэ Светлана Семенова. Маны таһынан дьүүллүүр сүбэҕэ үлэлээтилэр бэйиэт, прозаик, норуодунай суруйааччы Елена Васильевна Слепцова-Куорсуннаах, бэйиэт, прозаик, саха тылын уонна литэрэтиирэтин идэлээҕэ, суруналыыс Афанасий Гаврильевич Гуринов – Арчылан.
Барыта Ньурба, Үөһээ-Бүлүү, Чурапчы, Мэҥэ-Хаҥалас, Таатта, Өлүөхүмэ улуустарыттан кыттыыны ыллылар уонна ХИФУ Хотугулуу – Илиҥҥи норуоттарын тылларын уонна култуураларын үнүстүтүүтүн уонна А.Д.Макарова аатынан Дьокуускайдааҕы култуура уонна ускуустуба кэллиэһин устудьуоннара кыттыыны ыллылар.
Быйылгы «Аман Өс-2026» өрөспүүбүлүкэтээҕи араатардар кэтэхтэн күрэхтэрин спонсордарынан буоллулар: СӨ Ил Дарханын уонна СӨ Бырабыыталыстыбатын дьаһалтата, Гуманитарнай чинчийии уонна хотугу аҕыйах ахсааннаах омуктар проблемаларын чинчийэр үнүстүүтэ, ООО «Компания Дани Алмас», салайааччы Дария Скобелева, «Көмүөл» кинигэ кыһатын салайааччыта, В.Белов аатынан Россия литературнай бириэмийэтин лауреата, СӨ үтүөлээх суруналыыһа. Борис Павлов-Кэм, «Ситим-Медиа» бөлөх, «Күрүлгэн» уус-уран сурунаал бас эрэдээктэрэ, бэйиэт, прозаик, суруналыыс Афанасий Гуринов – Арчылан.
Күрэххэ анаан кыттааччылар тэттик видео матырыйаал устан ыыппыттарын дьүүллүүр сүбэ болҕомтолоохтук истэн, кичэллээхтик ырытан, анааран көрөн баран маннык түмүгү таһаарда:
«Дархан этээччи» үрдүк аатын ылла Мэҥэ-Хаҥалас улууһун Ытык сүбэ бэрэссэдээтэлэ Зиновий Иванович Игнатьев.
«Өркөн этээччи» анал аат бэрилиннэ «Ньурба оройуона» МТ дьаһалтатын исписэлииһэ Татьяна Егоровна Александрова.
«Хомоҕой этээччи» анал ааты Өлүөхүмэ улууһун Даппарай нэһилиэгин Кыллаах бибилиэтиэкэтин үлэһитэ Раиса Еремеевна Лавернова эрэллээхтик ылла.
Бу үс кыттааччыга СӨ Ил Дарханын уонна СӨ Бырабыыталыстыбатын дьаһалтатын Тыл сайдыытын боппуруостарын сүрүннүүр Управлениета анал суруктаах чорооннорун туттардылар, маны таһынан «Дани-Алмас» кинигэ кыһатын сертификатынан уонна добун суругунан наҕараадаланнылар.
«Сайдам этээччи» үрдүк аатын М.К.Аммосов аатынан ХИФУ устудьуона Михаил Дмитриевич Новиков ылла, киниэхэ добун сурук, анал статуэтка уонна саха тылын тылдьытын 15 туомун туттардылар.
«Биһирэмнээх этээччи» анал аатын Таатта улууһун Игидэй нэһилиэгин олохтооҕо Александра Семеновна Жулева ылла. Мэҥэ-Хаҥалас улууһун Майатааҕы «Сырдык Айыы сыдьаайа» түсүү салайааччыта, алгысчыт Анна Иннокентьевна Климентова «Алгыстаах этээччи» буолла.
«Кэскиллээх этээччи» А.Д.Макарова аатынан Дьокуускайдааҕы култуура уонна ускуустуба кэллиэһин устудьуона Константинова Анита Софроновна буолла.
