27.05.2026
Рубрика: Встречи, лекции
Саха Өрөспүүбүлүкэтин Национальнай бибилэтиэкэтин Кыраайы үөрэтэр национальнай пуонда салаата уонна Саха норуодунай суруйааччыта Елена Слепцова-Куорсуннаах “Этигэн тыл” сахалыы тыл этиитигэр, уус-уран ааҕыы ньымаларыгар Куорсуннаах тус методикатынан уһуйуу үөрэх буолан ааста. Ыам ыйын устата уһуйуу кыттыылаахтара санааны сахалыы сайа этэ, хоһоону ааҕыыга үөрэннилэр.
Үөрэҕи түмүктүүр тэрээһиҥҥэ конкурс ыытылынна. Үөрэнээччилэр ылбыт билиилэрин тургутан илин-кэлин түһүстүлэр. Норуот маастара Арассыыйа худуоһунньуктарын сойууһун чилиэнэ Анна Зверева, “Чолбон” уус-уран литература уонна общество-политика сурунаалын бас эрэдээктэрэ, Арассыыйа суруйааччыларын сойууһун чилиэнэ Гаврил Андросов, “Күрүлгэн” уус-уран альманах бас эрэдээктэрэ СӨ суруйааччыларын сойууһун чилиэнэ Афанасий Гуринов – Арчылан дьүүллээтилэр, сүбэлэрин-соргуларын тиэртилэр. Кыттааччылар хоһоон ааҕыытын түһүмэҕэр бэйэлэрин айымньыларын, ону таһынан саха суруйааччыларын Күндэ, С.Данилов, Л.Попов, В.Потапова хоһооннорун ааҕан уус-уран тыл долгураҥар уһуннулар. Тыл этиитин түһүмэҕэр араас тиэмэлэри ырытан, санааларын сайа этэн, билиһиннэрэн истээччилэр болҕомтолорун тартылар. Ол түмүгэр Александра Бочкарева «Богема» кэпсээнин сурунаал эрэдээктэрдэрэ үрдүктүк сыаналаатылар, Мария Тихонова этиитин «Күрүлгэн» сурунаалга таһаарарга этии киллэрдилэр. «Этигэн тыл-2026» муҥутуур кыайыылааҕынан СӨ норуодунай худуоһунньуга, СӨ ускуустубатын үтүөлээх диэйэтэлэ Александра Бочкарева-Иннокентьева – Сууралдьыма Куо буолла. Иккис миэстэҕэ Национальнай бибилэтиэкэ Кыраайы үөрэтэр национальнай пуонда салаатын үлэһитэ Екатерина Попова, үһүс миэстэҕэ учуутал идэлээх Мария Лаппарова таҕыстылар. ХИФУ 1 кууруһун устудьуона Михаил Новиков куолаһын, инники өттүгэр кэскиллээҕин тоһоҕолоон бэлиэтээтилэр. Өр сылларга оҕону иитиигэ, үөрэтиигэ кылаатын киллэрбит Мария Никонова гражданскай көрүүлээх хоһоон ааҕааччынан ааттанна. Ааптар Елена Слепцова-Куорсуннаах бастакы хараҥаччылара ылбыт билиилэрин олоххо тутталларыгар, салгыы сайдалларыгар ис-сүрэҕиттэн баҕа санаатын эттэ.
Мустубут дьон “Этигэн тыл” бырайыак билиҥҥи кэмҥэ ордук суолталааҕын өйдөөн уонна өйөөн туран балаҕан ыйыгар салҕанарыгар баҕардылар.
Төрөөбүт тылбыт туһугар ыытыллар «Этигэн тыл» бырайыагы СӨ Национальнай бибилэтиэкэтин Кыраайы үөрэтэр национальнай пуонда салаатын сэбиэдиссэйэ Лариса Кычкина салайан тэрийдэ.